|
Pu Jeremi Zobiakvela (Now in Glory) kha Mizo thalai rimawi ngainatute chuan kan hre theuhin a rinawm a. Zofate zingah chuan rimawi, ani tluka chenchilh hneh leh tuipuitu kha kan tam vak lo mai thei a ni. A hunlaiah na na na kha chuan amah kha kan ngai Superstar hle hlawm a ni tih pawh kan hre theuh bawk awm e.
Khawvel lam hla sa khan a tlan thui hle a. Rimawi avangin thian tam tak a neih phah a. Rimawi avanga thian a siam pawimawh em emte zinga pakhat chu, khatih hunlai, rambuai kan la nih laia Bawngkawna awm, 57 Mountain Brigade Sipai lal hote kha an ni. Anni ho khan Weekend-a (Inrinni zan) anmahni zaia awihlim tur khan an sawm zing hle a. ‘Amah avang khan Sipai leh Civil mite inpawhna thui tak a thlen phah a ni’ kan ti thei ang.
Pu JB-a (Ti tawh mai ang aw) khan a hun tawp lamah Lal Isua thisena tlan a nihzia inhrechhuakin, a Lalpa tan thahnem a ngai em em thin a. An Inah, ama sum sengin Gospel Camping a siam thin a. He’ng Camping-a rawn lut thinte hi mi 10 bawr velte an ni thin. Vawikhat chu kei pawh he Camp-ah hian lut ve turin, Hunthar Veng atangin PWD Tlang, Khatla-ah lo kalin min rawn hruai chhuak a. Chuta a thusawi ka la hriatreng chu, “Kan Camper hote hi an zavaia piangthar turin ka duh a, ka tawngtai lai hian pakhat chauh pawh piangthar sela ka lawm tho tho. A chhan chu, chumi chuan mi-dang pakhat tal Pathian hnenah a hruai anga, chutiang zelin, kum liam zelah malsawmna changtu an lo pung zel dawn a ni,” tih hi a ni.
Damdawi In-a a hun tawp a hman dawna a tawngka chhuak hnuhnung ber, ‘LALDUHAWM’ tia hlim hmel pu tak chunga tum thum ngawt mai a han au chhuak khan; tu dang mah a au lo. A Lalpa, hmel duhawm tak pu chunga amah rawn hmuak mektu kha a au a lo ni. A chhan pawh, amah rawn tlawhtu mi tam tak, a hun tawp dawn laia awm hote zingah khan Lalduhawma emaw, Lalduhawmi emaw an awm tlat lo. “Lalduhawm” tia a au lai khan a mitmeng kha a fiahin a fim hle tlat a ni.
Pu JB-a’n hriat a hlawhna lam ber, Rimawi khawvel lamah ve thung aw. Amah kha mi rilru tluang leh midangte sawisel ching lo tak mi a ni a. Music, a bik takin zaiah hian Note to Note-in a hria a, a thiam tih ka hrechiang khawp mai. Chuvang chuan a bula kan zaithiam hrang hrang hote chanchin leh an tlachham deuha ka hriat, ka han sawi vete reng reng hian Comment nalh lo tur ang chi engmah a sawi ngai lova, “Hma kan sawn chak ve tawh viau na a, hmabak erawh chu kan la ngah viauin ka ring” hi a ti duh lek chauh thin a. Music leh zai chungchang hriat duhzawng leh a kalphungte hi han zawt ila, kan hriatthiam ve phak loh thleng thleng hian sawi tur a hre leh thung thin si a.
Khawvel hla, teng deuh deuha a sakte leh fakna hla a sak thinte kha ka lo ngaithla ngun hle thin a. Aw teng tial deuh deuha a zai thin lai pawh khan aw ‘LAI’ leh Timing lamahte a buai ngai hauh lo a. Rock N Roll hla Hot taka a sak thiam em em laiin, hla lungkuai chi kha a sa runthlak thiam em em tho mai.
Pu. JB-a aw kha, zaithiam aw tha hluah hluah ang chi hi chu a ni hauh lo mai a. Nimahsela, a tihmawi dan leh a hun tak kha a hria ni mai lovin, a tihdan a thiam em em mai a. Puanthui tuin puanthan tha em em lo, uluk leh mawi taka a thai chhuah nen hian inang hle-in ka hre thin.
Pu JB-a hi kan hriatreng atana ka duhna chhan chu a thiltih tawh chu theihtawpa hlenchhuah duh mi a nihna leh a thinrim han so phutah pawh insum theihna a neih bakah, thuphachawi a lo tul pawha rilru inchhir tak tak tih hriata; chawplehchilha thupha chawia, ngaihdam a dil thei tlat thinte kha a ni. Khawvel hla sain a tlan a, tunge a nih kan hria. Pathian lamah a kal leh a, ‘Thlarau bo pakhat chauh tal pawh...’ tiin Chhandamna thu sawi kha a titi duhzawng leh a tuina ber a ni leh thung a. A chatuan ram pan tur tawngkam hnuhnung ber pawh LALDUHAWM tih a nih kha.
Tichuan, kan zaithiam tarn takte hian Pu JB-a kha entawntlak a nihna laiahte entawnin, an hla sakte uluk lehzual phah se. Ani kha ziathiama inchhal lo, a nihna kan hriatsak si a ni a. Hriat loh zawh erawh chu mi hrilh taima tak a ni thung.
Pu JB-a chuan kumin August ni 16 kha kum 5 min kalsanna champha a lo ni ta reng mai a. A rimawi khawvel luhchilh aia nasa a hit pawh kan ngah tawh hle mai thei. Nimahsela, a uluk anga kan zaithiamten uluk taka an hlate hi an sak theuh chuan ani ai khan an thleng thui thei zawk a ni tih inhria se a duhawm hle.
A tawp berah chuan, awih la awih suh la, Pu JB-a leh Rock N Roll Lalpa an tih mai Elvis Presley te thihcham, August ni 16 hi a inang chiah chiah asin!
He article hi kum 2004 khan Jason-a Pa, Khatla in a ziak a ni a. Amah hi kum 2007 October ni 4 khan Dy. Director, I & PR, PIO to CM niin chatuan ram min pansan tawh a ni. Amah hi mi inngaitlawm leh tlawmngai thei tak a ni a. A mize ril tak chu “Ni chu ni, nilo chu nilo” ti mai thin a ni. Thu leh hla thiam tak a ni bawk.
|
