Kha kum kha chhungkaw kima kan hman hnuhnun ber kum tur a ni ang tih ngaihtuahna nei miah lovin hlim takin naupangte nen kan phak ang tawk tawkin Krismas hmang turin kan inbuatsaih ve a. Pa ber hrisel lohna avangin harsatna hrang hrang karah buai ru ve tak chungin naupang pawh neih ang anga hlim taka hman tir ve chu kan nupa chuan kan thil tum ber a ni ve a. Ur lawk zana an intihhlimna tur ei leh in tur leh Mas Putar in a pek turte kan ngaihtuah sak vek hnu chuan kan hlim dun ve hle a, amah pawh ni dang ai chuan a that ve deuh avangin chhungkua a kan hlim ve hun ber kum a nih pawh ka ring. Tichuan, kum 1998 December ni 24 tlai lam a lo thlenga, kum dang aia chhungkua kan lo inbuatsaih vena pawh a hlimawm riau a hriatna ka nei a, kan pa pawh a hlim hle a ni. Tlai chaw ei kham hnu dar 7:00 bawr velah chuan kan nupa chuan kan sitting room-ah chuan kan thu dun a, nidang ang lo takin kan pa chuan, “Bawihi, music ngiahthlak ka chak riau a, i ngaithla ang hmiang” a ti a, kei pawh chuan “Ni e, kan tleirawl laia kan ngaihthlak thin te pawh ngaithla ila” ka ti fiamthu a. Tichuan kan audio tape player neih tha vak loh chu la chhuakin Jim Reeves, Elvis, Crystal Gayle... tih vel audio cassette chu ka la chhuak a, Jim Reeves Krismas hla ‘Blue Christmas’, ‘An Old Christmas...’ tih vel chu kan play a, chutia kan ngaihthlak tui lai tak chuan tleirawl pahnih hmeichhia leh mipa, kan la hmuh leh hmelhriat ngai loh hian kawngka an rawn kik a, kawngka chu ka va hawng a, “Hei hi Pu JB-a te in a ni em?” an ti a, “Aw ni e, lo lut rawh u” ka ti a, an lo lut a, thu tura ka han tih chuan “Kan hmanhmawh deuh a hei Christmas card leh cassette, kan kal leh mai ang” an ti a, “Kan lawm lutuk, leng ve rih ula” ka tih pawh chuan an kal leh nghal ta mai a, tun thleng hian tute nge an nih tih leh an hmel pawh chu ka la hre ta chuang lo a ni.

Tichuan, an thil rawn ken chu kan pa chu ka pe a, card chu a en a, cassette chu “Han play teh” a ti a. Ka han play a, ka hla hriat zawng chu a tam vak loh na in, hla hlui tha tak tak an ni hlawm tih chu ka hre ve nghal mai a. Cassette cover chu ka han en a, ti hian a lo in ziak a (khawlchhutin) - Zobiaka, Hunthar Veng, Aizawl ‘OLD SONGS REFUSING TO FADE’ - leh (kut ziakin) - Happy X-mas, Lalsawta - tih leh (khawlchhut bawkin) “Oldsongs are precious - we may not be touched by the words, we probably never know the words and their meanings. But the tunes take us back two or three decades. The cassette closes with “How Great Thou Art” by Elvis, hope you like the cassette” tiin. Zirsangzela Hnamte hla ‘Ainawni’ tih a “Kum sawm chauh tal ko kir a rem lo maw...” tihte kha min hriat chhuah tir ve khanglang a ni. Tin, he cassettte min petu hi Pu Lalsawta, Advocate, tuna Mission Vengthlanga awm a ni a, he cassette min pek hlut zia hi amah pawhin a hre phakin ka ring lo.

Tichuan, chu cassette chu kan nupa in kan play a, kan ngaithla ta reng mai a. Mas Urlawk zanah chuan ‘Good Understanding’, ‘There’s a New Moon over my shoulder’ tihte leh ‘Cotton Fields’... tih vel te chu kan ngaithla tui ta hle mai a ni. Chutia kan ngaihthlak tui lai tak chuan, kan pa chu zawhna chu ka zawt ta a, “Heng hla te hian a thu in nge a thlukin ti lungleng zawk che?” ka ti a, “A remna rimawi chuan” a ti daih a, ka hre thiam vak lova,”. .a thlukin i tihna a nih chu” ka ti vel ta mai mai a. Tichuan, kan pa lungleng chu a zual zel ni ngei tur a ni, pawna meichhem chu a rawt ta a, sa hem hmin tur te kan nei bawk a, unau dangte kan sawm khawm a pawnah chuan mei chu kan chhem ta hluah a, pawnah music ngaihthlak theih turin kan siam a, Pu Lalsawta cassette min pek chu kan ngaithla a, sa kan hem hmin bawk a, kan hlim hle mai a, naupang pawh an hlim hle a ni. Zing dar 1:00 vel lai kan meng thleng ta in ka hria.

Tun hnua ka ngaihtuah let leh hian, kha kum kha min Siamtu kan Pathian hian keini chhungkua, kum engemawzat natna avanga buai leh harsatna tinreng nen Christmas leh Kumthar te kan lo hman liam thin tawh te hre rengin, kan pa chu A hnena hruai a tum tawh avangin chhungkhat leh unau te nen Christmas hlimawm tak min lo hman tir a lo ni reng a.

Kum 1998 December ni 24 zan kha ka thinlung leh mitthla a cham reng thin chu a lo ni ta a ni.

Time may soothe our pain........Smiles may hide our tears,
But life and home will never be the same as silently we cry.

• Add New
• Search

Comments (0)

Write comment

Your Contact Details:

Name:

Email: do not notifynotify

Website:

Comment:

Title:

UBBCode:         -color-aquablackbluefuchsiagraygreenlimemaroonnavyolivepurpleredsilvertealwhiteyellow -size-tinysmallmediumlargehuge

Message:

Security

Please input the anti-spam code that you can read in the image.

Powered by !JoomlaComment 4.0 beta2